حلقات برنامج المايك معاك {1} عايز أبدأ بس مش عارف، مقالات التنمية البشرية، وعلم النفس
عايز ابدأ بس مش عارف ، اتفضل اتكلم ، كلنا سامعينك ، وزي ما بتقول اللغة
العربية ( كلنا آذان مصغية ) يا مرحب بيك ، في أول حلقة من برنامج ( المايك معاك )
التعريف بالبرنامج ، أحاول من خلال هذه المقالات حل المشكلات المجتمعية
بطريقة تعبيرية أو بعضها، من خلال الشرع
وعلم التنمية البشرية وعلم النفس والاجتماع ، والعمل على ذلك قدر المستطاع
(؟)
عايز ابدأ بس مش عارف ، جملة دمرت حياتي من زمان ، كانت حجة بايخة لكل
عجز مني .
شفت ادام عيني اصدقائي كل يوم بيتقدموا في حياتهم ، اللي بدأ يذاكر ويجتهد,
ويتفوق , ويجيب درجات عالية ، وأنا لسه مكاني محلك سر ، فضلت قاعد مكاني بقارن بين
اللي بينجح ، وأعجب باللي بيتميز وبيترك بصمة.
بس ارجع واقول لنفسي انا مش قلقان
. انا احسن منهم كلهم انا اقدر اعمل واوصل للي عملوه في وقت قصير واسبقهم كمان.
وتمر الأيام ولقيت نفسي ... لا ملقتش نفسي اصلا ، لقيتهم هما فوق ، اللي
كنت أوقات بتريق على اجتهادهم وتعبهم , لقيتهم فوق فوق اوي ، في عيون الناس ، هما
في قمة الهرم من فوق وأنا لسه تحت في القاع .
ياااااااااه دلوقت بس فوقت من غروري , بس الوقت اتأخر ، اتأخر اوي اوي .
مكذبش عليك . حاولت كتيييير في الفترة الأخيرة ، اني اعمل حاجة لحفظ ماء الوجه ,
على الاقل ادام نفسي .
دلوقت عايز ابدأ بس مش عارف ، عايز اشتغل حاجة بحبها بس مش عارف اعمل ايه ,
مش عارف ابدأ ازاي ، انا اصلا نسيت انا كنت بحب ايه .
دلوقت عايز ابدأ وأكون إنسان محترم ، لكن ازاي ؟ فات الآوان ، والناس مش
هتصدق اني اتغيرت.
دلوقت عايز اعمل حاجات كتير ، ايوة ، كتير اوي ، عايز اقرأ ، عايز اكتب ،
عايز مثلا ,,, امارس رياضة مفيدة .,, او اتعلم حاجة مفيدة ، برامج مثلا في
التكنولوجيا ، المهم حاجة تكون هادفة وليها معنى علشان ارجع احس بقيمة نفسي.
طيب شوف ،،، انا عايز ابدء أصلي صح ، فعلا ، عايز اصلي صح ، حاسس اني كل
صلاتي اللي فاتت كلها فشنك .
أنا عايز فعلا ابدأ أًصلي صح ،
بس مش عارف أبدأ .
تعرف .. أنا عايز اعمل اعمال خيرية ، مثلا اشارك بعض الشباب اللي بيقدموا
اعمال خيرية للناس ، أو اقدم اي حاجة اي حاجة مفيدة للناس .
عايز ابدأ بس مش عارف .
{!}
شكرًا يا صديقي على كلامك وصدقك ....
عايز اقولك ان كل واحد فينا جواه شوية مهارات ، رزق من ربنا ، وكل واحد
فينا جواه شغف تجاه شيء وعمل معين . لكن فينا اللي ببيقدر يكتشف ذاته ، وفينا اللي
بيعجز عن اكتشاف نفسه.
فعلشان تقدر تعمل حاجة .. ومتقلش ، بس مش عارف..
اول حاجة
لازم تكتشف ذاتك ، اعرف نفسك أولا ، ودي بتيجي بكذا طريقة ، منها
التجربة ، إنك تجرب حاجات كتير مختلفة ، وكمان تتعلم حاجات كتير من الحاجات اللي
مكنتش تعرفها ـ ومتقلش مش عارف ـ لأنك اصلا مجربتش ، يمكن العمل ده عايز مهارات
موجودة فيك ، ومن خلاله هتقدر تكتشف مهاراتك.
2 ـ اسأل الناس اللي حوليك انا اعرف اعمل ايه ؟ متخفش من تريقتهم ، شوف الناس اللي بتثق فيهم بدون ما يجملوك ، اعرف منهم انت متميز فيه ، وكمان عيوبك ايه، لأنهم في الغالب أكيد هيشوفوا فيك حاجات انت مش شايفها في نفسك.
3 ـ لو كانت مشكلتك مشكلة عمل ، فاول فرصة تجيلك في اول عمل اشتغل وابدأ ، متقلش مش مناسباني ، انت لسه مجربتش علشان تعرف. يمكن هو ده طريق البداية ونطقة الانطلاق وانت مش واخد بالك.
4 ـ لستة الأولويات. علشان تقدر ترتب حياتك وتظبط نفسك انت عايز تحقق ايه , اللسته دي هي اهدافك ، والأولويات ديمًا تبدأ باهتماماتك وشغفك لشيء معين ، اكتب الحاجات اللي عايز تعملها في دفتر، وبعد كدا رتبها حسب شغفك واهتمامك وابدأ نفذ حاجة ورا حاجة.
5 ـ تجاهل اصوات المحبطين اللي حوليك ، وكمان صوت نفسك اللي جواك وبيحبطك ، وعلشان تعمل ده بشكل كويس خلي ايجابيات العمل ده او الخطوة دي ادام عينك ديمًا حتى لو هتكتبها في ورقة او تسجلها صوت او تعملها فيديو تسمعها كل شوية؛ علشان تعطيك الحافز اللي صوته هيكون اعلى من صوت المحبطين.
6 ـ انتهز حماس البدايات ، ديما بنكون متحمسين في البداية ، وتدريجيا بيقل الحماس ده ، لو مستغلتش فرصة البداية يبقى هتفضل محلك سر .
واحفظ النصيحة دي مني يا صديقي: ان تسيرَ زاحفا ببطء نحو هدفك خير من أن
تظل واقفًا مكانك.
أخر حاحة
لازم تاخد بالك منها ، بل هي اهم شيء ورأس الحل كله ، وهي
الاستعانة بالله تعالى . في الحديث الصحيح: ((احرِصْ على ما ينفعُك، واستَعِنْ
بالله ولا تَعجِزْ)). الاستعانة بالله بتديك قوة .. بتديك صبر .. وبتديك روح
معنوية؛ لأن أكيد الطريق مش بيكون سهل ومش مفروش بالورد ، لكن هتقدر توصل طول ما
انت مستعين بالله .
تعليقات
إرسال تعليق